चार्ली कर्क हत्या सन्देही हिरासतमा रहेको ट्रम्पको दाबी

न्यू योर्क। अमेरिकी राष्ट्रपति डोनाल्ड ट्रम्पले उनका कार्यकर्ता चार्ली कर्कको हत्यामा संलग्न भएको शंका गरिएको व्यक्ति हिरासतमा रहको बताएका छन। उनले शुक्रबार बिहान ‘फक्स एण्ड फ्रेन्ड्स’ सँग कुराकानी गर्दै उक्त कुरा बताएका हुन।

चार्ली कर्क युटाहको ओरमस्थित युटाह भ्याली युनिभर्सिटीमा गोली हानी मारिएका थिए। ट्रम्पलाई फक्स एण्ड फ्रेन्ड्समा अनलाइन जानुअघि करिब पाँच मिनेटअघि यसबारे जानकारी दिइएको उनको भनाइ थियो। तर प्रहरी र कानुन कार्यान्वयन  निकायहरूले उनको दाबी अहिलेसम्म औपचारिक रूपमा पुष्टि गरेका छैनन्। ट्रम्पले सन्देहीको बुबाले अधिकारीहरूसँग समन्वय गरेको दाबी पनि गरेका छन्। 

एफबीआईले आरोपी(हरू)को पहिचान र पक्राउ गराउन सहयोग पुग्ने जानकारीका लागि एक लाख डलरसम्म इनाम घोषणा गरेको छ। अधिकारीहरूले बिहीबार राति सार्वजनिक गरेको भिडिओमा क्याम्पसका जिन्सी भर्‍याङ हुँदै छततर्फ जाँदै गरेको, कालो ब्याकप्याक बोकेको र अमेरिकी झण्डाको छाप भएको टिसर्ट लगाएको जस्तो देखिने एक व्यक्तिलाई देखाइएको छ। उक्त भिडिओमा छतबाट तल हाम फालेर भाग्ने दृश्य पनि देखिन्छ। प्रारम्भिक विवरणअनुसार सन्देही कलेज उमेरको भएको आशंका छ।

बिहीबार एफबीआईले घटनास्थल नजिकको वन क्षेत्रमा लुकेर राखिएको जस्तो देखिने एक उच्च क्षमताको बोल्ट–एक्सन राइफल फेला परेको जनाएको छ। सुरक्षा स्रोतहरूलाई उद्धृत गर्दै केही मिडियाले त्यो राइफल पुरानो आयातित माउजर भएको बताएका छन्। छतमा भेटिएको तीन राउण्ड कार्ट्रिजमा केही लेखिएको (केही अधिकारीहरूले प्रारम्भिक रूपमा “ट्रान्सजेन्डर” र “एन्टिफासिस्ट” शब्द भएको जस्तो देखिए पनि यसको अर्थ/उद्देश्य खुलेको छैन) भेटिएको र अझै परीक्षण भइरहेको जनाइएको छ। 
घटना बुधवार, सेप्टेम्बर १०, २०२५ मा भएको थियो। अधिकारीहरूको भनाइमा सन्देही बिहान ११:५२ क्याम्पसमा प्रवेश गरेर जिन्सी भर्‍याङ हुँदै नजिकैको भवनको छतमा पुगेका हुन। करिब १२:२० मा कर्कमाथि एक राउण्ड प्रहार भएको हो। कर्कलाई अस्पताल पुर्‍याइए पनि मृत घोषणा गरिएको थियो। सन्देही भवनको अर्को छेउतिरबाट तल ओर्लिएर नजिकैको बस्ती हुँदै फरार भएको विश्वास गरिएको छ। 

यो घटनालाई ‘राजनीतिक हत्या’ भन्दै युटाह गभर्नर स्पेन्सर कोक्सले सार्वजनिक सहयोग मागेका छन्। प्रहरीले २४ घण्टा सक्रिय रहँदै खोजी गरिरहेको बताइएको छ। ट्रम्प र गभर्नर कोक्स दुबैका अनुसार, अभियोग दर्ता र प्रमाण पुगेमा मृत्युदण्ड माग्ने तयारी छ। 

अनुसन्धानमा सात हजारभन्दा बढी टिप्स प्राप्त भएका र करिब दुई सय अन्तर्वार्ता लिइएका छन्। अधिकारीहरूले घर–घरको डोरबेल क्यामेरा फुटेज, प्रत्यक्षदर्शी बयान र क्याम्पस वरपरको मार्ग’ ट्रेस’ गर्दै थप प्रमाण संकलन गरिरहेको जानकारी दिएका छन्।