राष्ट्र संघीय आर्थिक तथा सामाजिक परिषद् (इकोसक)को अध्यक्षमा नेपाल निर्वाचित

न्यूयोर्क । संयुक्त राष्ट्र संघको आर्थिक तथा सामाजिक परिषद् (इकोसक)को अध्यक्षमा नेपाल निर्वाचित  भएको  छ । न्युयोर्कस्थित संयुक्त राष्ट्र संघको मुख्यालयमा विहीबार भएको परिषद्को बैठकले नेपाललाई आगमी एक वर्षको लागि अध्यक्षमा निर्वाचित गरेको हो । बैठकमा इकोसाकका निवर्तमान अध्यक्ष तथा क्यानडाका स्थायी प्रतिनिधि बब रेले राष्ट्रसंघका लागि नेपालका स्थायी  प्रतिनिधि लोक बहादुर थापालाई अध्यक्षताको पदभार हस्तान्तरण गरेका थिए । 
इकोसक बैठकको अध्यक्षता ग्रहण गर्दै थापाले जलवायु कार्य, खाद्य सुरक्षा लगायतका प्रमुख मुद्दाहरुलाई प्राथमिकतामा राखेर परिषद्लाई सक्रिय बनाउने बताए । अध्यक्ष थापाले इकोसकको नेतृत्व निर्वाचित भएको क्षण नेपालका लागि ऐतिहासिक भएको बताउदै नेपालले बहुपक्षीयतामा पु¥याउँदै आएको दीर्घकालीन प्रतिबद्धताको प्रमाणको रुपमा यो नेतृत्व रहेको बताए । 

थापाले आफ्नो नेतृत्वको कार्यकालको मूल मन्त्र “अझ राम्रो सेवा दिने रहने बताएका छन्। यसमा साझेदारीहरू मजबुत बनाउने र बहुपक्षीयतालाई प्रोत्साहित गर्दै सन् २०३० को दिगो विकास लक्ष्यको कार्यान्वयनलाई प्रभावकारी बनाउने लक्ष्य राखिएको बताए । थापाले भने, “अझ राम्रो सेवा दिने विकल्प होइन, यो अनिवार्यता हो। यसैमार्फत हामी बहुपक्षीयतामा विश्वास पुनःस्थापना गर्न, विभाजनहरू घटाउन, कमजोर वर्गलाई सशक्त बनाउन र प्रतिबद्धतालाई व्यवहारमा उतार्न सक्छौं।”
बैठकले अगामी वर्षका लागि चार उपाध्यक्षहरू पनि चयन गरिएको जसमा अल्जेरिया, स्पेन, डोमिनिकन रिपाब्लिकन, र आर्मेनिया रहेको संयुक्त राष्ट्रसंघ सूचना केन्द्रले जनाएको छ । परिषद्का ५४ सदस्य राष्ट्र हुन्छन् । 

इकोसाक संयुक्त राष्ट्रसंघका ६ प्रमुख अंगमध्ये एक हो, जसले अन्तर्राष्ट्रिय आर्थिक र सामाजिक सहयोग तथा विकास प्रवद्र्धन गर्ने जिम्मेवारी लिएको हुन्छ । यसले संयुक्त राष्ट्रका विशेषज्ञ एजेन्सी, आयोगहरू र निकायहरूलाई दिगो विकासदेखि मानव अधिकारसम्मका मुद्दाहरूमा समन्वय गर्छ। यो विश्वव्यापी सामाजिक र आर्थिक मुद्दामा छलफल, सहमति निर्माण र कार्यान्वयन प्रवद्र्धन गर्ने प्रमुख मञ्च हो।

थापाका अनुसार, संसारको विकास एजेन्डा निर्माण गर्ने केन्द्रीय निकाय हो र “कसैलाई पनि पछि नछोड्ने” लक्ष्यमा केन्द्रीत छ। थापाले यसको सफलताका लागि सबै सदस्य राष्ट्र र सरोकारवालाको सक्रिय सहभागिता र समर्पण आवश्यक रहेकोमा जोड दिए । 

तस्बिरहरुः युएन सूचना केन्द्र