म्यानहटन शहरको मुट्टुमा एकाबिहानै हेल्थकेयरका सिईओको गोली हानी हत्या

न्यूयोर्क । म्यानहटन शहरको मुट्टु मानिने मिडटाउनको एक होटल नजिक एक व्यक्तिको गोली हानी हत्या गरिएको छ । अज्ञात व्यक्तिद्धारा प्रहार गरिएको गोली लागेर बुधवार बिहान पौने सात बजेतिर ती व्यक्तिको मृत्यु भएको प्रहरीले जनाएको छ । मृत्यु भएका व्यक्ति युनाइटेड हेल्थकेयरका सिईओ ५० वर्षीय ब्रायन थम्पसन भएको प्रहरीले जानकारी दिएका छन् । 

मृतक ब्रायन थम्पसन 

मिडटाउनको प्रसिद्ध होटल हिल्टनको प्रवेशद्धार नजिकै ब्रायनलाई निकै नजिकबाट गोली प्रहार भएको प्रहरीको प्रारम्भिक भनाई छ । गोली लागे लगतै उनलाई नजिकैको माउन्ट साइनइ अस्पतालमा लगेपनि उनको मृत्यु भएको बताइएको छ । 

मिडटाउनको  वेष्ट फिप्टीफोर स्ट्रिट र सिक्स एभेन्यू नजिकैको हिल्टन होटलमा एक मिटिङमा सहभागी हुन ब्रायन होटलतर्फ जाँदै गर्दा यो घटना भएको जनाइएको छ । घटना लगतै प्रहरीले अनुसन्धान शुरु गरेका छन् । प्रारम्भिक अनुसन्धानका आधारमा एक अज्ञात व्यक्तिले थम्पसनलाई होटलको प्रवेशद्वारको नजिकै गोली प्रहार गरेका र उनलाई छातीमा गोली लागेको प्रहरीको भनाई छ । 

प्रहरीले घटनास्थललाई घेराबन्दी गरेर, होटलको सीसीटिभी फुटेजको अध्ययन गरेको बताइएको छ । फुटजमा एक कालो ज्याकेट र पाइन्ट लगाइएका सिकुटे व्यक्तिले उनलाई गोली प्रहार गरेको देखिएको छ । फुटपाथमा रगतको धप्को नजिकै कम्तीमा पाँच शेल गोलीका खोका देखिएका थिए ।

गोली हान्नुको कारण अझै खुलेको छैन । हालसम्म कसैलाई पक्राउ गरिएको छैन र अनुसन्धान जारी रहेको प्रहरीले जनाएको छ ।